Бүгін футболдан Премьер-лига командалары арасындағы ел біріншілігінің кейінге қалдырылған ІХ-турының соңғы ойыны өтеді.
Бұл кездесуде қостанайлық «Тобыл» мен шымкенттік «Ордабасы» шеберлік байқасады.
Ойын Қазақстан уақытымен 19:00–де басталып, «Qazsport» телеарнасынан тікелей эфирде көрсетіледі.
Аталған турдағы өзге ойындар 17 және 18 мамыр күндері өткізілді. 17 мамырда Көкшетаудың «Оқжетпесі» «Ақтөбеге» 1:3 есебімен есе жіберсе, «Атырау» мен «Жетісу» (Талдықорған) 1:1 есебімен тең түсті.
Сондай-ақ 18 мамырда Жезқазғанның «Ұлытауы» «Астанаға» 0:2 есебімен жеңілсе, Қызылорданың «Қайсары» түркістандық «Тұранды», Семейдің «Елімайы» алматылық «Қайратты» 1:0 есебімен қапы қалдырды.
Ал «Жеңіс» (Астана) мен «Қызылжар» (Петропавл) 0:0 есебімен тең түсті.
Сұрмергендер көшінде Назми Грипши («Астана») 13 голмен көш бастап тұрса, одан кейінгі орындарда Марин Томасов («Астана») пен Дастан Сәтпаев («Қайрат») 11, Дәурен Жұмат («Оқжетпес») 9 голмен келеді.
Еске алсақ, бұдан бұрын «Қайрат» «Жеңісті» 3:1 есебімен жеңіп, турнир кестесінде көш басына шықты.
Фото: «Ордабасы» футбол клубы.
