Бүгіннің өзінде елімізде шамамен 1,5 миллион адам киберспортпен айналысады екен, дейді penalty.kz.
Қазақстанда киберспорт саласы қарқынды дамып келеді. Жақында Премьер-Министр Олжас Бектенов пен Phygital International ұйымының басшысы Рене Фазельмен кездесуде елімізде шамамен 1,5 миллион адам киберспортқа қызығушылық танытатыны айтылды. Бұл көрсеткіш Қазақстан киберспорт федерациясының (QSF) ішкі аналитикалық деректеріне негізделген.
Бұл көрсеткіш қайдан шықты?
QSF өкілдерінің айтуынша, ел көлемінде бұл бағытта нақты социологиялық зерттеу жүргізілмеген. Дегенмен, федерация жобаларының қамту ауқымы, ойыншылар белсенділігі мен платформалардағы статистика негізінде киберспортпен айналысатындардың саны 1,5 миллион адам шамасында деп бағаланған. Бұл көрсеткіш кәсіби киберспортшыларды емес, жалпы қатысушыларды қамтиды.
Қандай ойындар танымал?
Қазақстанда ең танымал кибердисциплиналар — CS2, Dota 2, PUBG Mobile және Mobile Legends: Bang Bang (MLBB). Ұлттық құраманың орташа жасы – 20 жаста. Ал CS2 ойыны бойынша кәсіби деңгейге жеткендер 1–5% аралығында ғана. Қалғаны — күшті әуесқойлар мен жаңа бастаған ойыншылар.
Киберспорт негізінен Алматы, Астана және Шымкент қалаларында кеңінен дамуда.
«Біз бірқатар бастаманы жүзеге асырып жатырмыз. Ең алдымен — ұлттық құраманы жасақтау мен ұлттық іріктеу турнирлерін өткізуге мән береміз. Бұл — шын мәнінде, жастар үшін әлеуметтік лифтке айналып отыр. Жеңімпаздар Қазақстан атынан халықаралық турнирлер мен әлем чемпионаттарына қатысу мүмкіндігіне ие болып, тәжірибе жинап, әлемдік аренада өнер көрсетеді», — деп мәлімдеді федерация өкілдері.
Арнайы мамандық ашылды
QSF мен APEMS университеті бірлесіп, «Киберспорт» атты жаңа мамандық ашты. Оқу гранттары да қарастырылған. Сонымен қатар, 2025 жылы Астанада CS2 бойынша PGL ASTANA атты ірі халықаралық турнир өтті. Ал 2026 жылы елімізде «Болашақ ойындары» (Games of the Future) ұйымдастырылады.
Қызығы, Qazaq Cybersport Federation ресми тіркелген спорттық ұйым болса да, әлі күнге дейін мемлекеттік қаржыландыру алмаған. Федерация болашақта аудиторияны терең зерттеп, нақты дерекке сүйенгісі келеді, алайда ол үшін қаржылай қолдау мен платформалардың көмегі қажет.
«Қолымызда нақты зерттеу болмағанымен, статистика мен ішкі деректер арқылы шамалап есептейміз. Бұл салада әлеует зор, әрі оны жүйелі түрде дамыту үшін ғылыми талдау мен мемлекеттік серіктестік қажет», – дейді QSF өкілдері.
Қазақстандық киберспортшылар
Соңғы 10 жылда бірнеше қазақстандық киберспортшы миллион доллардан аса қаржы ұтып алған. Тағы 50-ге жуық ойыншы $100 мыңнан жоғары табысқа қол жеткізген. Бірақ мәселе мынада — олардың көбі шетелдік ұйымдар атынан өнер көрсетеді.
Фото: Navigator.az.
