Футболдан Қазақстан U-19 жасөспірімдер құрамасы 2025/26 Еуропа чемпионатына іріктеудің элиталық кезеңінде алғашқы жеңісіне жетті.
Қазақстандық футболшылар бесінші топта сынға түсіп жатыр. Қарсыластары — Украина, Румыния және Солтүстік Ирландия.
Отандастарымыз бүгін Румыниямен шеберлік байқасты. Ойын барысында олардың қатарынан Абылайхан Төлеухан 13, Азамат Тұяқбаев 66-минутта мергендік танытты.
Енді қазақстандық футболшылар алдағы ойынын 28 наурызда Украинаға қарсы өткізсе, 31 наурызда Солтүстік Ирландиямен кездеседі.
Бүгін бұл топта Украина құрамасы Солтүстік Ирландияны 1:0 есебімен тізе бүктірді.
Іріктеу кезеңінің матчтары 2026 жылдың 25-31 наурызы аралығында Румынияда өтеді. Әр топтың жеңімпазы 2026 жылдың 28 маусымы мен 11 шілдесі аралығында Уэльсте өтетін Еуропа чемпионатының финалдық кезеңіне жолдама алады.
Айта кетсек, Қазақстан U-19 жасөспірімдер құрамасы екінші іріктеу кезеңінде Ирландияны 1:0 есебімен жеңіп, Кипрмен 1:1 есебімен тең түссе, Нидерландқа 1:2 есебімен есе жіберді.
Нәтижесінде өз тобында екінші орынға табан тіреп, элиталық кезеңге жолдама алған еді.
Сондай-ақ бүгін еліміздің U-19 жасөспірімдер құрамасы элиталық кезеңдегі алғашқы ойынында Аустриямен 0:0 есебімен тең түсті. Енді олар 28 наурызда Дания, 31 наурызда Чехиямен шеберлік байқасады.
Еске салсақ, олар Хорватияда футболдан 17 жасқа дейінгілер арасында өткен екінші іріктеу кезеңінде Қазақстан құрамасы өз тобында бірінші орынға ие болып, элиталық кезеңге шыққан еді.
Фото: ҚФФ.
