Осыдан бірер күні бұрын Чемпиондар лигасының жартылай финалында «Интер» өз алаңында «Барселонаны» қабылдап, алаң иелері қосымша уақытта 4:3 есебімен жеңіске жетті. Бұл жеңіс италиялық ұжымға турнирдің финалына өтуге мүмкіндік берді. Ал клубтың жеңіске жетуіне үлес қосқандардың бірі деп 37 жастағы Франческо Ачербиді айтуға болады. Себебі дәл Франческоның 90+3 минутта соққан голы команданы жеңілістен құтқарып қана қоймай, матчтың экстра-таймға жалғасуына әсер етті. Оның үстіне бұл Ачерби үшін оның карьерасындағы алғашқы гол болды.
34 жастағы Малый Ачербидің жетістігінен соң Instagram-дағы Stories-те Қазақстан футболында жасқа байланысты сын көп айтылатынын тілге тиек етті:
«Неліктен Италияда жасы үлкен футболшыларға қатысты сыни көзқарас жоқ?» – деп риторикалық сұрақ қойды ойыншы.
Айта кетейік, Украинаның Луганск қаласында туған Малый 2013 жылдан бері ҚПЛ-да, ал 2014 жылдан бері Қазақстан құрамасы сапында өнер көрсетеді.
Фото: ҚФФ.
