Қазақстан құрамасының бас бапкерінің көмекшісі Елдос Ахметов, спорт журналистері Ермұхамед Мәулен, Олжас Байбосын және Әлімжан Асқар 2026 жылғы әлем чемпионатының іріктеу кезеңінің басталуын талқылады. FonTeam подкастында Станислав Черчесовтың Қазақстан құрамасындағы болашақ тағдыры да сөз болды, деп жазады penalty.kz.
Ермұхамед Мәулен Ұлттар Лигасындағы ойындар ұлттық құраманың шынайы деңгейін көрсеткенін атап өтті:
“Біз өз деңгейіміздің шегін көрдік. Асхат Тағыберген айтқандай: «Міне, біздің деңгей, біз бұдан артық не істей аламыз?» Ұлттар Лигасындағы тобымызды көрген кезде-ақ, қарсыластарымызды жеңе алмайтынымыз түсінікті болды. Норвегия, Словения және Австрия – бұл командалар әлемнің үздік 30 құрамасының қатарына кіреді. Холланд, Эдегор, Серлот сияқты ойыншыларды Қазақстандағы барлық футбол жанкүйерлері таниды. Бірақ біздің құраманың кейбір ойыншыларын тіпті өз елімізде де бәрі біле бермейді.” – деді Мәулен.
Гвардиола да жағдайды өзгерте алмайды
Танымал комментатор Қазақстан құрамасының мәселесі бапкерге емес, жүйеге байланысты екенін айтты:
“Ұлттар Лигасындағы сәтсіздіктер біз үшін белгілі бір терапия болды. Бас бапкер Адиев болсын, Черчесовтың орнында Пеп Гвардиола болсын – нәтиже өзгермес еді. Бізді шынайы жағдайға қайтарды. Магомед Адиев кезінде 4-5-1 схемасымен ойнап, қорғанысқа басымдық бердік. Негізінде, 10 ойыншымыз қорғанысқа тартылды. Осылай 0:0 есебімен ойнауға болады. Мұндай нәрсені 2008-2010 жылдары көрдік: Әзірбайжан мен Арменияны жеңіп, 10 ұпай жинадық. Егер мақсатымыз тек қорғаныс болып, гол салу маңызды болмаса, онда бұл ойын стилі жалғаса береді. Бірақ ондай футбол кімге қызық?” – деді Мәулен.
Қазақстан құрамасының алдағы матчтары
Еске сала кетейік, биыл Қазақстан құрамасының бас бапкері қызметін уақытша отандық маман Әли Әлиев атқаруда. Оның дебюттік ойыны 22-23 наурызда түнгі 00:45-те Қазақстан уақытымен Уэльс құрамасына қарсы өтеді. Ал 26 наурызда Әлиевтің шәкірттері сырт алаңда Лихтенштейн құрамасымен кездеседі.
Фото: qfl.kz.
