Белгілі бапкер Болат Есмағамбетов «Аладоп.кз» тілшісіне «Қайраттың» ЧЛ плей-офф кезеңінің қарымта ойынындағы мүмкіндігін бағалап, пікірін айтты.
Кеше алматылық клуб сырт алаңда 0:0 есебімен ойнап, жауап матч алдында тиімді нәтижеге қол жеткізген.
«Қайрат» бірінші таймада өте жақсы ойнады деп айтуға болады. Гол салатын мүмкіндіктерін көрдік. Үзіліске дейінгі статистика бойынша, алматылықтар қарсыласынан есе жіберген жоқ. Уразбахтин өзінің үйреншікті схемасын қойды. Бұл жерде ең бастысы гол жібермесе екен деген ой болды, «Қайрат» қақпасын аман алып қалды. Чемпиондар Лигасында командалар мәселені өз алаңында шешеді. Кеше әсіресе қорғаушыларымыз өте жақсы ойнады. «Селтиктікі» британиялық футбол ғой, тарысқа, күреске толы ойынды жақсы көреді. Бірақ, қонақтар шотландиялықтарға ондай мүмкіндікті берген жоқ. Меніңше, «Қайрат» допты әдейі бере салды да, өздері қарымта шабуылға иек артты. Ал басты мақсаты — жеңілмеу болғаны анық. Соны орындады. Енді мүмкіндігі өте жақсы. Пайызға шаққанда 60 та 40 деп айтуға болады. Алматыда өте қызық ойын болады. «Селтик» ашулы келеді. Ұтамыз деген оймен ойнайды. «Қайрат» қарымта кездесуде қорықпай шабуылдап, бір-екі моментін жүзеге асырса, керемет болады. Осыған дейін клубтық, құрама деңгейдегі командалар Астанаға келетін. Футболды түсінетін, жақсы көретін адамдар Алматыда да көп. Енді біз де Еуропаның мықты командалары Алматыға келсе деп тілейміз», — деді Б. Есмағамбетов.
Командалардың жауапты ойыны 26-тамызда Алматыда болады.
Фото: «Селтик» — «Қайрат» кездесуі.
