Футзалдан Қазақстан чемпионатының 37-турында күтпеген нәтиже тіркелді. «Аят» Рудныйда көш басындағы «Қайратты» 4:1 есебімен тас-талқан етті, деп жазады penalty.kz.
Рудный қаласында өткен кездесуде алаң иелері алғашқы минуттардан-ақ басымдық танытты. 11-минутта Иван Марахов есеп ашты. Араға екі минут салып Джефферсон дос Сантос «Аяттың» басымдығын еселей түсті. Екінші таймда Ерсұлтан Сағындықов (29-мин) пен Леандро Батиста (32-мин) қарсылас қақпасына тағы екі доп салып, нәтижені 4:0-ге жеткізді.
Алматылықтар шабуылы тек 33-минутта нәтижелі аяқталып, Алиссон бір голмен жауап қайтарды — 4:1. Осылайша матч сенсациялық жеңіліспен аяқталды.
Бұл кездесуден кейін 35 ойыннан кейін «Қайраттың» еншісінде 91 ұпай қалды. Команда әлі де көш бастап тұр. Алайда басты бәсекелесі — «Семей» 90 ұпаймен өкшелеп келеді, әрі оларда бір ойын артық.
Ал «Аят» осы ірі жеңістен кейін 33 матчтың нәтижесінде 57 ұпай жинап, турнир кестесінде үшінші орынға көтерілді.
Фото: Instagram/@mfc_ayat_official.
