Футболдан Премьер-лига командалары арасындағы Қазақстан чемпионатының жетінші туры мәресіне жетті, деп жазады ҚазАқпарат.
Жанкүйерлер Қызылордада «Қайсар» мен «Астана» кездесуіне көз тікті. Биыл қызылордалық ұжым тек қазақстандық футболшыларға сенім білдіріп отыр. Ал елордалық клуб негізінен легионерлерге үміт артады. Сондықтан жанкүйерлер көкейінде «Қайсар» оларға қауқар көрсете ала ма деген сауал тұрды.
Кездесу барысында «Астана» ойын тізгінін қолға ұстауға тырысты. Десе де оған алаң иелері лайықты төтеп берді. Ойынның 41-минутында елордалық командадан Джеффри Чинедудің пенальтиден тепкен добы қақпа бағанасына тиіп, кейін серпілді. Бірінші кезеңде таблодағы есеп өзгеріссіз қалды.
Астаналық команда екінші кезеңді бірден белсенді бастады. Қызылордалық клуб қарымта шабуылға иек артты. Осындай сәттердің бірінде «Қайсар» шабуылшысы Нұрдәулет Ағзамбаевты елордалық қорғаушылар өз айып алаңында шалып шықты. Төреші белгілеген пенальтиді шебер орындай білген Айбар Жақсылықов қызылордалық клубты алға шығарды.
Ойынның 90-минутында «Қайсар» қақпасына тағы бір мәрте пенальти белгіленді. Одан Назми Грипши мүлт кетпей, таразы басын теңестірді. Осылайша командалар 1:1 есебіне қанағат білдірді.
Аталған турдағы тағы бір кездесуде Көкшетаудың «Оқжетпесі» сырт алаңда Семейдің «Елімайын» 2:0 есебімен тізе бүктіріп, сенсациялық жеңіске қол жеткізді.
Ал қостанайлық «Тобыл» өз алаңында Петропавлдың «Қызылжарын» 2:1 есебімен сүріндірді.
Сондай-ақ 3 мамырда «Тұран» (Түркістан) мен «Жетісу» (Талдықорған) 0:0 есебіне қанағат білдірсе, «Атырау» өз алаңында шымкенттік «Ордабасыға» 1:2 есебімен жол берді.
Сырт алаңда алматылық «Қайрат» жезқазғандық «Ұлытауды» 4:1 есебімен жеңсе, «Ақтөбе» елордалық «Жеңісті» 1:0 есебімен тізе бүктірді.
Фото: ҚФФ.
