20-сәуірде 17 жасқа дейінгі жастар арасында Азия кубогының финалы өтті. Сауд Арабиясында өтіп жатқан доп додасының финалына алаң қожайындары мен Өзбек жастары шыққан.
Сауд Арабиясы ширек финалда Жапония, ал жартылай финалда Оңтүстік Корея таланттарын ұтқан. Екеуінен де пенальти сериясында басым болған…
Финалда Өзбек жастарына шамалары жетпейтінін біліп, бірінші таймның аяғында екі футболшыны алаңнан қуды. 40-минутта Нұрбек Сәрсенбаев, ал 45+2-минутта Миразиз Абдукаримов қызыл қағаз алды…
Алайда өз-ағамның өрендері 2-таймда құйындай орап соғып, тоғызы 11 арабты палау пісіретін қазандағы сәбіздей қуырды. 50-ші және 70-ші минуттарда Хакимов пен Хасанов екі доп салды.
Сөйтіп, Өзбек жастары Азияның ең үздік командасы атанды. Sadriddin Khasanov осы доп додасының «Ең бағалы ойыншысы» атанды. Asilbek Aliev — турнир сұрмергені (5 гол). Ал Nematulloh Rustamjonov — ең үздік қақпашы.
Айтпақшы, төрешілер Өзбекстан құрамасының екінші ойыншысын алаңнан қуғанда, бас бапкері Islombek Ismoilov сұқ саусағымен көк төбені нұсқады (3-фото). «Бәрін көріп тұр» — дегені ме, «қорықпайсыңдар ма» — деп, қапа болғаны ма, білмеймін…
Әлқисса, өзбектің өрімдей жас «Ақ бөрілері» (Oq boʻrilar) осымен екінші рет Азия кубогының жеңімпазы атанып отыр. Бірінші рет 2012 жылы топ жарған. Биыл өз тобында Таиландтан (4:1), Қытайдан (2:1) және Сауд Арабиясынан (3:0) басым түсті. Ширек финалда БАӘ жастарын (3:1), ал жартылай финалда КХДР футболшыларын (3:0) бұйым құрлы көрмеді. Алты ойында 17 гол соғып, өз қақпаларына 3 доп қана өткізіп алды.
Нұрғазы Сасаев.
