Қазір бокс федерациясына реформа керек деп жатыр. Сол реформаны ұрандатып көбісі бас бапкер Мырзағали Айтжановтың отставкасын талап етуде.
Негізі реформа деген бір адамды басқа адамға ауыстыру емес. Мырзағалиді қанша сынасақ та, оның орнына қандай керемет маман келсе де, жағдайды түзете қоймас. Себебі, біздің олимпиададағы сәтсіздіктің себебі тек қана ұлттық құрамадағы былықтарда емес. Мәселе одан да терең.
Бокс саласында жүрген біраз мамандардың мақалаларын оқып, подкасттарын тыңдап шықтым. Әркімнің жеке пікірі бар болса да, бір мәселеге келгенде ой-пікірлері ортақ. Ол мәселе — біздің бокстағы әбден тамырланып кеткен әділетсіздік. Тіпті 12-13 жастағы балалар арасындағы жарыстар мен іріктеу кездесулерде төрешілер жеңілген балаға жеңісті бере салу мүмкін. “Атақты жаттықтырушының баласы” деп, жанып тұрған баланың орнына қолынан түк келмейтін баланы сбор-жиындарға қосу мүмкін.
Оған қоса, бас төрешінің артына кіру, ақша жинап беру, моншада қарсы алу, жершілдік, рушылдық деген нормаға айналған. Осының бәрі тіпті енді ғана бокс әлеміне тәй-тәй басып келе жатқан балалар жарыстарынан бастап жиі кездесетін болған.
Жас жігіт түңілсе, ауыр жұмыс пен жаттығудан емес, әділетсіздіктен түңіледі. Сол себептен, ересектер категориясына жетпей тұрып кадет, жасөспірім кезеңінде қолын сілтеп спорт саласынан кетіп қалған потенциалы бар боксшыларамыз қанша? Осындай жүйе бар бола, біздің ұлттық құрамада мықтының мықтылары жиналған деп айтуға болмас.
Реформа дейтін болсақ, балалар спортынан бастап ұлттық құрама деңгейіне дейін осы жүйені толықтай өзгертіп, әділетсіздікті жою керек. Сол кезде ғана бірнеше олимпиададан кейін нәтиже болса болар. Ал Мырзағалидің орнына Базарғали боксымызды гүлдендіреді деп босқа үміттенудің қажеті жоқ.
Өз ойым, бокс-күрестен гөрі агрессиясы жоқ жүзу, гимнастика, жүгіру сияқты спорт түрлеріне назар аударған дұрыс сияқты. Біріншіден, бас пен құлақ аман. Екіншіден, бір спортшы елге бірнеше медальмен келе алады. Бокстағыдай олимпиаданың соңына дейін бір адамнан жалғыз медаль күтіп отырмайсың.
Так что, қазақтар, гимнастика мен жүзуге берейік балаларымызды.
Ілияс Мыңжасаров.
Фото: olympic.kz.
