Қазақстан ұлттық құрамасының экс-бас бапкері және соңғы уақытта «Химки» клубының уақытша жаттықтырушысы болған Магомед Адиев енді «Крылья Советов» клубын баптайды, деп жазады penalty.kz.
Келісімшарттың талаптары
Журналист Иван Карповтың дерегіне сүйенсек, 47 жастағы маманның кандидатурасын Самара облысының губернаторы Вячеслав Федорищев мақұлдаған. Адиев клубпен «1+1» форматы бойынша келісімшартқа қол қояды (1 жыл + тағы 1 жылға созылу мүмкіндігі).
Жаңа трансферлер болады
Мәліметтерге сәйкес, клуб Адиевтің тағайындалуынан кейін бірден бес ойыншыны жалға алуды жоспарлап отыр:
- Антон Зиньковский («Спартак»)
- Игорь Дмитриев («Спартак»)
- Вадим Раков («Локомотив»)
- Никита Салтыков («Локомотив»)
- Егор Смелов («Динамо» Мәскеу)
«Крылья Советов» жаңа кезеңге аяқ басты
2024/25 маусымында Ресей Премьер-Лигасында 10-орын алған Игорь Осинькин 27 мамырда клубтан кеткен болатын. Ол 2020 жылдан бері команданы басқарып келді.
Еске сала кетейік, Адиевтің бұрынғы клубы «Химки» келесі маусымда РПЛ-де ойнау құқығынан айырылды — команда лицензия алмаған. Турнир кестесінде 12-орын алғанымен бұл нәтиже жоғары дивизионда қалуға жеткіліксіз болды.
Фото: championat.com.
