Бастаманы ең бірінші болып «Қайсар» қолға алған еді. Қызылордалық клуб бірер күн бұрын келімсек футболшылардың барлығын елдеріне қайтарды. Қазір тек қазақ балаларынан тұратын команда жасақтап, алдағы маусымға дайындалып жатыр.
Клутбың жаңадан тағайындалған басшысымен танысып, сұхбат жазып қайттым. Талғат Әбдіғаппарұлы жергілікті ойыншылармен де жоғарғы лигада қалуға болатынын айтады және сол мақсатта жігіттер жасыл алаңда барын да, жанын да салмақ.
Бұған қоса, клуб басшысы мемлекеттік бюджетке салмақ салмаудың амалдарын да қарастырып жатыр. Қазірдің өзінде демеушілер тауып, келісім жасасуға кіріскен. Алдағы мамырда қалада жаңа стадион қолданысқа беріледі. Сол жерде біраз коммерциялық жобаларды жүзеге асырып, клубты өз шығынын өзі жабатын деңгейге шығаруымыз керек дейді жас маман.
Айтпақшы, «Қайсардан» кейін көкшетаулық «Оқжетпес» пен астаналық «Жеңіс» те легионерсіз ойнайды деген ақпарат алдым. Вообщым, мұз орнынан қозғалды. Отандық футболды майшелпекке айналдырып, білгенен істеп үйренгендерге енді қиын болады. Бұған дейін олар легионерлерге миллиарттаған ақша төлеп келді. Бұған қоса, сол келімсектер арқасында өздерінің де қалтасын қампайтып, жемқорлыққа белшеден батып жүрді.
Қысқасы, осы «Қайсар», «Жеңіс» және «Оқжетпестің» мысалы басқа аймақтарға да сабақ болуы тиіс. Аталмыш клубтар қазақ балаларына мүмкіндік беріп жатыр және биыл дұрыс қадам жасағандарын дәлелдейді. Мен оған сенімдімін…
Аслан Каженов
