Бұл өзгеріс ұлттық спорттағы ішкі бәсекелестікті күшейтіп, талантты жастарға көбірек мүмкіндік беруді көздейді, деп жазады penalty.kz.
Алматы облысында ұлттық спорт түрі – көкпардан жасөспірімдер арасындағы Қазақстан чемпионаты өтті. Бір аптаға созылған тартысты додаға еліміздің түкпір-түкпірінен 14 команда жиналды. Финалда Түркістан мен Жамбыл құрамалары шеберліктерін көрсетті. Негізгі уақыт 7:7 есебімен аяқталып, қосымша кезеңде Түркістан командасының ойыншысы Айтуған Ерболат «алтын салымның» авторы атанып, өз командасына жеңіс сыйлады.
Федерация президентінің мәлімдемесі
Матчтан кейін көкпаршылармен кездескен Қазақстан көкпар федерациясының президенті Айдарбек Қожаназаров ішкі біріншіліктің форматы өзгеретінін айтты. Оның сөзінше, кейбір өңірлерде бір ғана емес, 4–5 мықты команда бар. Сондықтан барлығына мүмкіндік беру үшін жаңа жүйе қажет.
Клубтық жүйенің артықшылықтары
Айдарбек Қожаназаров алдағы жылдан бастап көкпарға клубтық жүйе енгізілетінін жариялады:
«Қазір республикалық жарыстарға әр облыстан бір ғана команда қатысады. Ал клубтық жүйе енгізілгенде бірнеше команда бақ сынай алады. Бұл қабілетті жігіттер мен талантты жастардың тасада қалмауына көмектеседі. Барлығына бірдей мүмкіндік бергіміз келеді. Осы арқылы ішкі бәсекелестікті күшейтіп, ұлттық спортымыздың дамуына тың серпін бергіміз келеді», – деді федерация президенті.
Клубтық жүйе енгізу арқылы көкпардағы ішкі бәсекелестік артып, талантты жастарға жол ашылмақ. Сарапшылардың пікірінше, бұл қадам ұлттық спортты дамытуға жаңа серпін береді.
Фото: gov.kz.
