«Барыс» хоккей клубы канадалық қақпашы Оливье Родригпен келісімшартты бұзды.
Команданың баспасөз қызметінің хабарлауынша, ол жаттығу кезінде жарақат алған.
— Осыған байланысты Оливье Родриг жан-жақты медициналық тексеруден өтті. Тексеру нәтижесінде қақпашының қосымша емдеуді қажет ететін жарақаты анықталды. Нәтижесінде Родриг пен «Барыс» арасындағы келісімшартты өзара келісім бойынша бұзу туралы шешім қабылданды, — деп мәлім етті команданың баспасөз қызметі.
«Барыс» хоккей клубы канадалық қақпашы Оливье Родригпен биыл біржақты келісімшарт жасасты. Келісім бір маусымға есептеліп, 2026 жылғы 31 мамырға дейін күшінде болуы тиіс еді.
Қақпашы «Эдмонтон Ойлерз» жүйесінен келді. Бұл клуб оны 2018 жылғы драфтта таңдаған. Өткен маусымда Оливье ҰХЛ-де алғаш рет мұз айдынына шығып, сондай-ақ АХЛ-дағы «Бейкерсфилд Кондорс» сапында 41 ойын өткізді.
Фото: «Барыс» хоккей клубы.
