ҚР Ұлттық Олимпиада комитетінің вице-президенті Жанар Өтешова өз басшысы Геннадий Головкиннің жалақысына қатысты мәлімдеме жасады, деп жазады 1bol.kz.
Бұған дейін Олимпиада чемпионы Бақтияр Артаев Головкиннің 20-25 млн теңге шамасында жалақы алып отырғаны туралы мәлімдеген болатын. YouTube-каналдардың біріне сұхбат берген ол Александр Винокуровтың да табысы аз емес екенін, айына 100 мың еуро алып отырғанын айтып қалды.
Осы мәлімдемеден кейін ҰОК вице-президенті Жанар Өтешова Артаевтың жала жапқанын айтып, Головкиннің аталған лауазымда мүлдем жалақы алмайтынын мәлімдеді. Ал, жалған ақпарат таратқан экс-боксшыны енді сотқа сүйреуі мүмкін.
«ҰОК президентіне ешқандай жалақы қарастырылмаған, ол ерікті ретінде тегін жұмыс істейді. Президенттікке кіріскенде Геннадий Геннадьевич бірден ҰОК-тің мемлекеттік бюджетпен жұмыс істемейтінін ашық айтты», — деп жазды Өтешова өзінің Instagram-парақшасында.
Оның айтуынша, Ұлттық Олимпиада комитеті қазір білікті заңгерлер жалдап, аталған мәселені сот арқылы шешпекші екен.
«Мұның салдары міндетті түрде болады», — деп сөзін түйді ҰОК вице-президенті.
Фото: instagram.com/zhanar_utesheva.
