21 қазан өткен «Қайрат» (Алматы) – «Пафос» (Кипр) арасындағы Чемпиондар лигасының матчы VAR шешімінен кейін дауға айналды. Есепке алынбаған голдан кейін таблодағы қазақша жазу жанкүйерлер наразылығын тудырды, деп жазады penalty.kz.
УЕФА Чемпиондар лигасының 2025/26 жылғы маусымындағы 3-тур ойыны Алматыдағы “Орталық стадионда” ерекше эмоциямен өтті. Ойын тартысты өтті. Тіпті гол да соғылды. Алайда төрешілер шешімімен кейін ол есепке алынбады.
VAR тексерісінен кейін төреші «офсайд» (ойыннан тыс) жағдайын анықтады. Бірақ ең қызығы — таблода көрсетілген жазудағы қате болды: экранда «Гол соғу жоқ. Ойыннан тыс күй» деген түсініксіз аударма пайда болды. Бұл бірден жанкүйерлердің назарына ілігіп, сынына ұшырады.
Матч аяқталған соң әлеуметтік желілерде жанкүйерлер бұл жағдайды қызу талқылай бастады. Көпшілік аударма мен мәтін сапасына жауапты мамандардың немқұрайлығын сынға алды.
«Алматы — қазақ әдебиетінің астанасы дейміз, ал мынау не?»
«Тым болмаса “No goal” деп жазбас па еді?»
«Қазақтар өз тілімізді өзіміз түсінбей отырмыз ғой!»
Естеріңізге сала кетейік, кеше алматылық ұжым өз алаңында “Пафос” клубын қабылдады. Қарсыластар 90 минутта өзара мықтыны анықтай тең тарқасты. Есеп – 0:0. Осылайша “Қайрат” Чемпиондар лигасының жалпы кезеңіндегі алғашқы ұпайын еншіледі.
Фото: tengrisport.kz.
