Футболдан Қазақстан құрамасының жаңа бапкерлер құрамы белгілі болды.
Жақында ұлттық құраманың бас бапкері міндетін уақытша атқарушы болып Талғат Байсуфинов тағайындалды. Оған Иван Азовский, Марат Еслямов, Али Алиев және Елдос Ахметов көмектеседі. Ал қақпашылар бапкері қызметі Олег Воскобойниковке жүктелсе, дене дайындығы бапкері Максим Зуев, бапкер-сарапшы Могамед Нозадзеге жүктелген.
Еске салсақ, қазірге дейін қазақстандық футболшылар Бельгия (0:6), Уэльс (1:3, 0:1) пен Солтүстік Македония (0:1) құрамаларынан жеңіліп, Лихтенштейннен (2:0) басым түсті.
Ұлттық құрама өз алаңында 10 қазанда Лихтенштейнді қабылдаса, 13 қазанда сырт алаңда Солтүстік Македониямен шеберлік байқасады.
Еске салсақ, Фабио Каннаваро футболдан Өзбекстан құрамасының тізгінін ұстады.
Белгілі бапкер құрамаға 2026 жылғы әлем чемпионаты финалдық кезеңінде жетекшілік етеді. Өзбекстандық футболшылар өз тарихында алғаш рет дүниежүзілік додаға жолдама алған болатын.
Фото: ҚФФ.
