Халықаралық футбол қауымдастығының кеңесі (IFAB) 1 шілдеден бастап күшіне енетін жаңа ереже туралы хабарлады. Енді пенальти кезінде доп қақпаға енсе де, ойыншы кездейсоқ түрде допқа екі рет тиген жағдайда соққы қайта орындалады, деп жазады penalty.kz.
Бұл өзгерістер «Атлетико» шабуылшысы Хулиан Альварестің оқиғасынан кейін пайда болды. Чемпиондар лигасының 1/8 финалындағы матчта аргентиналық шабуылшы тайып кетіп, допқа екі аяқпен бірден тиген. Гол соғылғанымен есепке алынбады. Сол себепті IFAB ережені нақтылауға мәжбүр болды.
1 шілдеден бастап не өзгереді?
- Егер ойыншы пенальти кезінде допқа кездейсоқ түрде екі рет тисе — мысалы тайып кетіп, допқа екі аяқпен жанаса — бірақ соққы голға айналса, пенальти қайта орындалады.
- Егер мұндай қос жанасу кезінде гол соғылмаса, онда қарсы командаға еркін соққы беріледі.
- Ал матчтан кейінгі пенальти серияларында мұндай қос жанасу болса, соққы нәтиже бермеген деп есептеледі.
Ереже бұзу – еркін соққы
Егер ойыншы әдейі допқа бірден екі аяқпен тисе немесе бір рет соққаннан кейін тағы да өзі допқа жанасса — бұл жағдайда да ереже бұзылды деп саналып, қарсыласқа еркін соққы беріледі. Ал пенальти сериясында мұндай соққы саналмайды.
Фото: champion.com.ua.
