«Аладоп.кз» «Қайраттың» ЧЛ 3-іріктеу кезеңіндегі кездесуінің қарсаңында белгілі бапкер Болат Есмағамбетовпен хабарласып, алматылық клубтың мүмкіндігі жайлы пікірін білген болатын.
Танымал маман сондай-ақ, словакиялық команда туралы ойын ортаға салып, командалардың мықты-осал тұстарын да тілге тиек еткен. Айта кетейік, ертең алматылықтар Словакия чемпионы «Слованды» қабылдайды. Қарымта ойын 12-тамызда Братислава қаласында болады.
— Болат Жолдасұлы, алматылық ұжым ЧЛ-да биыл өз алаңында табысты ойын көрсетуде. Ертең де жақсы ойын мен тиімді нәтиже күтуге бола ма?
— Қалай дегенде де ертең қызық ойын болады. Бірден айту керек, екі команда да өзінің алаңында ойнағанды жақсы көретін, жалпы жақсы нәтиже көрсететін ұжымдар. Бұл теке-тірестің тағдырын өз алаңындағы матчтар шешеді деп ойлаймын. «Қайрат» қазір бабында. Чемпионатта бірінші орында келеді, да шабуылы керемет. Алматыда жанкүйерлер лық толады. Алаң иелерінің құрамында тереңдік жеткілікті, команда ҚПЛ-де, Чемпиондар Лигасында да қиналмай ойнай бере алады. Олар ертең көп шабуылдайды, мұны алдындағы екі ойын көрсеткен. «Қайрат» жылдам гол салса, ары қарай жақсы болар еді. Мұндай матчтарда жылдам гол салу өте маңызды. Екінші кездесудің алдында орысша айтқанда, жақсы «задел» жасап алу керек. Меніңше, ертең «Қайратта» көп мүмкіндік болады және алаң иелері көп гол ұрады.
— «Слован» алдыңғы екі командамен салыстырғанда әлдеқайда мықтырақ көрінеді…
— Иә, «Слован» — тәжірибелі клуб. Өз елінде талай рет чемпион болған, былтыр ЧЛ негізгі кезеңінде өнер көрсетті. Бірақ, онда бір ауыз толтырып айтарлықтай нәтижесімен есте қалмады. Бапкері де мықты. Владимир Вайсс — Словакия футболындағы ең тәжірибелі маман. Керемет жаттықтырушы деп айтуға болады. «Қайратта» да жақсы жұмыс істеп кетті. Басты проблемасы – «Слован» әлі тонусқа кірмеді, Словакияда чемпионат енді басталуда. Команданың, әсіресе қорғаныстағы ойыны осал көрінеді, оны «Зриньскиймен» кездесуде байқадық. Босниялықтар екі гол салды, тағы бірнеше мүмкіндіктері болған. Сонымен қатар, шабуыл шебі де мықты. Онда өзінің көшбасшылары бар – Стрелец, Барсегянды айтуға болады. Бірақ, олар өздерінің оптимальный бабына енді-енді келіп жатыр. «Слован» — «Қайраттың» алғашқы екі қарсыласынан көш ілгері. Чемпиондар Лигасында солай, әр кезең сайын тек қана мықты қарсылас тап болып отырады. Словакиялық команда Алматыда қорғанысқа көбірек көңіл бөлетін шығар. Қарымта шабуылдарға иек артуы мүмкін.
— Әңгімеңізге көп рахмет, Болат Жолдасұлы
Сіздерге де!
