Қазақстанның бірінші ракеткасы, әлемдік WTA рейтингінде 10-орында тұрған Елена Рыбакина өзінің жаңа жаттықтырушысымен ынтымақтастық басталғанын хабарлады, деп жазады penalty.kz.
Бұл жолы теннисші физикалық дайындық бойынша маман Альдо Кьяримен бірге жұмыс істейтінін мәлімдеді.
Альдо Кьяри — спорттық дайындық пен фитнес саласында тәжірибесі мол маман. Оның келуімен Рыбакина алдағы жарыстарда физикалық тұрғыда сенімді өнер көрсетуге ниетті екенін байқатты.
Соңғы турнирлерге тоқталсақ, Елена Рыбакина Германияның Штутгарт қаласында өтетін турнирде чемпиондық атағын қорғаудан бас тартты. Оның орнына отандық құрама сапында Billie Jean King кубогының іріктеу кезеңіне қатысуды жөн көрді.
Бұл шешім өзінің жемісін берді: Рыбакина алдымен әлемнің 62-ракеткасы, австралиялық Кимберли Бирреллді 6:3, 7:6 есебімен жеңсе, кейін колумбиялық Юлиана Лисарасоны (WTA рейтингінде 680-орында) 6:1, 6:2 есебімен тізе бүктірді.
Фото: Instagram/@lenarybakina.
