Италияның А Сериясының 35-турына арналған апталық символикалық құрам белгілі болды. Бұл тізімге өзбекстандық шабуылшы Эльдор Шомуродов та кірді. Бұл туралы мәліметті беделді WhoScored аналитикалық платформасы жариялады, деп жазады penalty.kz.
«Рома» клубының сапында өнер көрсететін Эльдор Шомуродов бұл турда нәтижелі голдық пасымен көзге түсіп, команда жеңісіне сүбелі үлес қосты. WhoScored платформасы оған 7.10 ұпай, ал SofaScore — 7.4 ұпай берді. Сарапшылар Шомуродовтың алаңдағы белсенділігін, қарсылас қорғанысын жиі тығырыққа тіреген әрекеттерін ерекше атап өтті.
Шомуродов үздіктер қатарында
Апталық үздік құрамда Эльдор Шомуродов Адемула Лукман, Шарль Де Кетеларе, Марко Ретеги және Хассан Камара сынды жоғары деңгейдегі футболшылармен бірге аталды. Бұл ойыншылардың орташа бағалары 7.5 ұпайдан асып, олардың турдағы үздік өнер көрсеткенін дәлелдеді.
«Шомуродов шабуыл шебінде айқын ойын өрнегін көрсетті. Оның жылдамдығы мен ойынды оқи білуі — «Романың» шабуылын жандандыра түсті», — деп атап өтті сарапшылар.
Өзбек футболының абыройы артып келеді
«Рома» Чемпиондар лигасының жолдамасына таласып жатқан тұста Эльдор Шомуродовтың тұрақты және сапалы ойыны команда үшін маңызды рөл атқарып отыр. Ол креативті шешімдер қабылдай білетін шабуылшы ретінде өзбек футболының халықаралық деңгейдегі абыройын арттыруда.
Фото: olimpbet arena.
