Байрақты бәсеке 2027 жылы өтеді.
Нақты қай қалада болатыны әзірге белгісіз.
Менің ойымша, Астана не Алматы қабылауы қажет.
Жуырда ғана тағайындалған спорт министрі Ербол Мырзабосынов Венгрияға барып, Халықаралық дзюдо федерациясының президенті Мариус Визермен кездесті. Осы басқосу барысында елімізде дүниежүзілік доданы өткізу туралы және елімізде дзюдо академиясының филиалын ашу туралы келісімдерге қол қойылды.
Қай-қайсы да отандық спорт үшін, әсіресе, отандық дзюдо үшін керемет жаңалық.
Естеріңізде болса, 2015 жылы Астанада алғаш рет дзюдодан әлем чемпионатын ұйымдастырдық. Сол кезде Елдос Сметов алтын медаль жеңіп алып, ел абыройын асқақтатқан еді. Кейін жеңіс жолын жалғап, олимп шыңын да бағындырды. Енді алдағы жарыс қазақтың қыз-жігіттеріне жаңа мүмкіндік сыйлайды. Жас таланттардың жарқ етіп шығуына жақсы серпін береді. Яғни, кезекті тарихи жетістіктің куәгері боламыз, бұйырса.
Бәріне сәттілік!
Аслан Каженов.
