Қазақстандық каратэші Дайяна Даренская Ташкентте өтіп жатқан Азия чемпионатында -68 келі салмақта жеңімпаз атанды, деп жазады 1bol.kz.
19 жастағы спортшының бұл – ересектер арасындағы алғашқы үлкен жеңісі. Дайяна жастығына қарамастан өте жоғары деңгейде өнер көрсетті.
Алғашқы айналымда отандасымыз Біріккен Араб Әмірлігінің спортшысы Фатма Хасайфты жеңсе, екінші жекпе-жекте Гонконг өкілі Вонг Чеук Лиді тізе бүктірді (5:0). Ал, жартылай финалда индонезиялық Аль Хумайра Лубисқа еш мүмкіндік бермеді (8:0). Ақтық шешуші сында жапон қызы Кама Цубасаның осал тұсын тапты.
Бұл – Дайянаның мансабындағы үлкен үшінші жүлдесі. Өткен жылы ол жастар арасындағы Азия чемпионатында топ жарса, 2023 жылы күміс жүлдеге қол жеткізген.
Еске салайық, бұған дейін Ташкенттегі жарыста қазақстандық каратэшілер жекелей сайыста 1 алтын, 4 қола медаль алған. Одан бөлек, командалық сайыста ерлер құрамасы қола медальға ие болған.
