Лондондық “Челси” Дастан Сәтпаевтың трансферінен кейінгі қадамын айқындап қойыпты. Бұл туралы TheChelseaChronicle.com сайты хабарлады, деп жазады Aladop.kz.
Дереккөздің мәліметінше, “Челси” Сәтпаевты ресми түрде өз қатарына қосқан соң, оны тәжірибе жинау мақсатында жалға жіберуді жоспарлап отыр. Жас таланттың толықтай Лондонға ауысуы келесі жылы, яғни ойыншы 18 жасқа толған сәтте жүзеге аспақ.
“Челсидің” ойлап отырғаны Дастанның Еуропаның жоғары деңгейлі лигаларында ойнауға толық дайын болып келуі.
Қазірдің өзінде клуб Сәтпаевпен жеке жұмыс істейтін маманды тағайындаған. Ол жас ойыншының техникасы мен тактикалық түсінігін жетілдіріп, қазіргі клубы “Қайраттағы” дамуын жалғастыруына көмектесуде.
Сондай-ақ басылым Сәтпаевтың өз әлеуетін көрсетуге тағы бірнеше мүмкіндігі бар екенін жазды. “Қайрат” осы маусымда Чемпиондар лигасында “Интер” және “Арсеналмен” кездеседі — бұл матчтар Дастан үшін Еуропаның үздік командаларына қарсы өзін дәлелдеудің мүмкіндігі болмақ.
Сарапшылардың пікірінше, Сәтпаевтың келесі маусымда “Страсбург” клубына жалға берілу ықтималдығы жоғары дейді.
