Екі боксшы алғаш рет 2022 жылы кәсіби рингте кездескен еді. Ол кезде Әлімханұлы WBO белбеуі үшін өткен жекпе-жекте төрешілердің бірауыздан шығарған шешімімен жеңіске жеткен болатын.
Сол кездесуден кейін Бентли бірнеше рет «Qazaq Style»-ға ашық түрде шақыру тастап, қарымта жекпе-жек өткізуді талап еткен.
Бұл жолы британдық боксшы Әлімханұлының әлеуметтік желідегі жазбасына жауап қатты. Қазақстандық чемпион Карлос Адамеске үндеу тастап, «Адамес! Сен қайдасың?» деп жазса, Бентли дереу өз пікірін қалдырды:
«Бәрін қойшы. Өзің қайдасың?», – деп реваншқа тағы да шақырды.
Айта кетейік, қазіргі таңда Дензел Бентли орта салмақтағы Ұлыбритания чемпионы атағына қоса, WBO International және Еуропалық бокс кеңесінің чемпиондық белбеулеріне ие.
Соңғы кездері қазақстандық WBO/IBF чемпионы Жәнібек Әлімханұлы Карлос Адамеске іздеу салып жүргені белгілі. Дегенмен, Адамес келесі жекпе-жегінде орыс боксшысымен жұдырықтасатынын мәлімдеді.
Фото: ©instagram.com/janibek_alimkhanuly.
