Отандық маман Болат Есмағамбетов «Аладоп.кз» сайтының тілшісімен сұқбаттасып, «Астананың» КЛ 2-іріктеу кезеңіндегі бірінші ойынына қатысты пікірін айтып, екінші ойынға болжамын берді.
Кеше «Астана Арена» алаңында елордалықтар 1:1 ойнады.
«Алдында айтқан ойымда қаламын — «Астана» мұндай қарсыластан өтуі керек. Өте алмаса ертең ана бапкерлерге үлкен сұрақ болады. Кешегі кездесуден кейін кішкене бір осадок дейді ғой, сондай бір екіұдай күйде қалғанымыз рас. Бір жағынан елордалықтар жеңіске жететіндей талай мүмкіндік болды, ал екінші жағынан ұтылып қалуы да мүмкін сияқты бір күпті сезім бар. Мысалы, есеп 0:1 болып жатқан молдовандарда бір жақсы момент болды. Бірақ, Құдай сақтап қалды дегендей… Қаншама мүмкіндік болды, футболшылар өз алаңында, жанкүйерлері келіп отырған кезде олардың жүзеге асыруы керек еді. Ал 1:1 «Зимбруға» өте тиімді нәтиже. Олардың бапкерлері Олег Кубаревпен кезінде бір командада ойнағанбыз. Үзілістен кейін қонақтар қорғанысқа жатты, «Астана» ұтылып жатқан соң алдыға жүгірді деп айтуға болады. Қарсыластың қарымта шабуылдары да қауіп төндіргенін мойындау керек. Қарымта матчта да фаворит – «Астана» деп ойлаймын. Молдовада да кешегіндей мүмкіндіктер болады, жалпы екінші ойында елордалықтарға жеңілдеу болатын сияқты. Неге десеңіз, молдовалық футболшылар ашылып, шабуылға ойнауы тиіс, өз стадионы, жанкүйерлері болған соң. Бірақ, бәрібір «Астана» «Зимбрудан» барлық жағынан мықты және ұтады деп ойлаймын. Өз командамызға сәттілік тілейміз», — деді Б. Есмағамбетов.
Командалар 31-шілдеде жауапты матч өткізеді.
