Бокстан ересектер арасындағы ел чемпионаты Семей қаласында өтеді.
Қазақстандық былғары қолғап шеберлері 12-19 қазан аралығында әр салмақта өзара мықтыны анықтайды. Оған еліміздің барлық өңірінен тәжірибелі боксшылар келеді деп жоспарланған.
Әзірге кімдердің қатысатыны белгісіз. Десе де ел біріншілігі тартысты өтеді деп болжанып отыр.
Айта кетсек, алдағы қыркүйек айында World Boxing аясында Англияның Ливерпуль қаласында өтетін бокстан әлем чемпионаты болады.
Қазақстандық былғары қолғап шеберлері дүбірлі додаға әзірлігін Алматы облысында жүргізіп жатыр. Енді олар соңғы дайындығын пысықтау үшін Шеффилд қаласына аттанады. Онда 10-нан аса елдің боксшылары бой көрсеткен жиынға қосылады.
Қазақстан бокс федерациясының мәліметінше, аталған жиынға тек таңдаулы боксшылар шақырылған. Әр салмақ дәрежесінде 4 спортшыдан келді.
— Былғары қолғап шеберлері 26 тамызда Ұлыбританияға аттанады. Біріншілік алдында Шеффилд қаласында бірлескен оқу-жаттығу жиыны өтеді. Оған Франция, Швеция, Норвегия, Германия, Литва, АҚШ, Косово, Филиппин, Польша, Ирландия, Үндістан құрамалары қатысады деп күтілуде, — деп мәлім етті Қазақстан ерлер құрамасының бас жаттықтырушысы Қайрат Сәтжанов федерацияға берген сұхбатында.
Фото: Қазақстан бокс федерациясы.
