Күндіз боксшылар туралы өз ойымды жазып, «бокста саяси бедел мен “көмектің” де маңызы зор екенін білеміз» деп жаздым. Енді осы сөздерімді тараштап өтсем деп едім…
Дәл қазір бокстан алтын алуымыз өте қиын секілді. Өздеріңіз білесіздер, Токио төрінде алтын тұрмақ, күміске де зар болдық . Аузымызды қу шөппен, яғни екі қола жүлдемен «сүрттік».
Сол себепті нақты шаралар жүзеге асырыла бастағандай. ҰОК басшысы болып, Геннадий Головкин бекітілді. Ал GGG Париж Олимпиадасы басталмай тұрып, ХОК президентімен кездесті. Мұның бәрі жай ғана кездесу деп ойламаймын…
Ал содан соң… Содан соң GGG бүкіл әлемді таң қалдырып, «біздің федерацияға IBA сапынан шығуға кеңес беремін» деп салды. Дәл қазіргі халықаралық саяси жағдайды ескере отырып, «МҮМКІН ЕМЕС» бұлай айтуы деп таң қалдым.
Ағылшын тіліндегі нұсқасын оқып, таңдай қағып, бас шайқадық. Мұның бәрі «Олимпиада ойындары кезінде төрешілер біздің боксшыларға қиянат жасамаса екен» деген ой-жоспардың қолға алынып, алдын-ала «қимылдау» әрекеттері жүзеге асырыла бастады деп білемін…
Ал Головкиннің осы сөздерінен кейін қандай «қиындықтарды» басынан кешкені өзіне ғана – аян. Өйткені, IBA тізгінін ұстап отырған елдің ұрда-жық басылымдары «зар-запырандарын» «құсып-төге» бастады.
Көпшілікке танымал тұлғаларының сөздерімен «Головкин есірді, байыды, ақша мен байлыққа әбден тойған, тойынған» деген сықылды зәрлі сөздерімен ашу-ызаларын сыртқа шығара бастады…
Сонымен, Париж Олимпиадасы да басталды. Әзірше ештеңе де «түсініксіз» сияқты. Қытай бұл жолы алтын ала алмас. Ерлер арасында Франция, Өзбекстан, Куба боксшылары чемпион болатын шығар-ау. Бізге де бір алтын бұйырып қалар деп отырмын.
Ал Париж Олимпиадасынан кейін… әзірше үн-түнсіз жүрген біздің бокс федерациясы «IBA – біздің серіктесіміз, біз оның құрамынан шыға алмаймыз» десе… оған да таң қалмаймын… Мүмкін қателесермін…
Нұрғазы Сасаев.
Фото: olympic.kz.
