Аустралияның Брисбен қаласында өткен Билли Джин Кинг кубогының іріктеу турнирінде алғашқы болып кортқа Юлия Путинцева мен Майя Джойнт шықты. Қазақстандық теннисші әлемнің 23-ракеткасы болса, 18 жастағы қарсыласы 78-сатыда еді. Путинцева Джойнтты 6:2, 6:1 есебімен ойсырата ұтты. Бір сағат 15 минутқа созылған бәсеке барысында Путинцева 9 брейк-пойнттың төртеуін пайдаланды.
Ал, Елена Рыбакина (WTA рейтингінде 10-орын) Кимберли Биреллді (WTA рейтингінде 61-орын) 6:3, 7:6 (7:4) есебімен жеңді. Екінші сетте қазақстандық теннисші 1:5 есебімен ұтылып жатса да, камбэк жасап, жеңісті жұлып алды. Бұл – Еленаның Қазақстан құрамасы сапындағы жекелей сында 10 матчтағы 8-жеңісі.
Осылайша, Қазақстан құрамасы «D» тобында көш бастады. Күннің үшінші матчында Анна Данилина мен Жібек Құламбаева жұбы Сторм Хантер мен Эллен Переске қарсы ойнайды.
Сондай-ақ, Қазақстан құрамасының сапында Зарина Диас та тіркелген, ал команданың капитаны — Юрий Щукин.
Билли Джин Кинг Кубогының финалдық кезеңіне сегіз құрама қатысады, қазіргі чемпион — Италия.
2022 жылы Қазақстан финалдық кезеңде ойнаған болатын, бірақ ол кезде жарысқа 12 команда қатысқан еді.
Фото: WTA.
