Англияның Ливерпуль қаласында World Boxing аясында өтіп жатқан әлем чемпионатында Қазақстан құрамасынан Бибарыс Жексен (65 келі) ширек финалдан аса алған жоқ.
Отандасымыз ширек финалда өзбекстандық Абдумалик Халоковпен шеберлік байқасты.
Абдумалик Халоков 2024 жылы Париж Олимпиадасында чемпион атанса, әлем чемпионатында бір мәрте алтын, бір мәрте күміс алды.
Жекпе-жек барысында отандасымыз қарсыласына көбірек соққы жұмсауға тырысты. Дегенмен ол қарсыласына жол беріп, әлемдік додадан шығып қалды.
Бүгін ел құрамасынан Алуа Балқыбекова (51 келі), Махмуд Сабырхан (55 келі), Төрехан Сабырхан (70 келі), Аида Әбікеева (65 келі), Виктория Графеева (60 келі), Елдана Талипова (80 келіден жоғары) жартылай финалға шықса, Нұрбек Оралбай (80 келі), Сағындық Тоғамбай (90 келі), Карина Ибрагимова (57 келі) жарыс жолын аяқтады.
Енді ел құрамасынан Ертуған Зейнулинов (65 келі), Айбек Оралбай (90 келіден жоғары) шаршы алаңға шығады.
Дүбірлі дода 4-14 қыркүйек аралығында Англияның Ливерпуль қаласында өтеді. Жекпе-жектер «Qazaqstan» және «Qazsport» телеарналарынан тікелей эфирде көрсетіледі.
Әлемнің әр қиырынан келген боксшылар 4-10 қыркүйек аралығында іріктеу кезеңінде сайысқа түседі. Ал 12-13 қыркүйекте жартылай болса, 13-14 қыркүйекте финалдық бәсекелер өтеді.
Фото: ҰОК.
