Түркияның «Бешикташ» клубы Испанияның «Вальядолид» командасымен Қазақстан құрамасының жартылай қорғаушысы Бақтиер Зайнутдинов бойынша келіссөзді жалғастырып жатыр, деп жазады 1bol.kz.
Стамбұл клубы қазақстандық футболшыға 5 млн еуро сұраған. Бұл туралы Match KZ телеграм-каналы хабарлады.
«Бешикташ» негізі Зайнутдиновті жалға беруге дайын. Бірақ, талапқа сәйкес, испаниялық клуб қазақстандықты маусым соңында сатып алуы керек. Түркия клубы жартылай қорғаушының құнын 5 млн еуроға бағалап отыр.
Биылғы маусымда Бақтиер Зайнутдинов Стамбұл клубы сапында 12 матч өткізіп, бір нәтижелі пас берді. Гол соға алған жоқ.
«Реал Вальядолидке» келетін болсақ, бұл команда 21 турдан кейін Ла Лигада соңғы, 20-шы орында келеді. Келесі маусымда олар төменгі лига – Сегундада ойнауы мүмкін.
Фото: Бешикташ ФК.
