Отандық танымал олихарх Берік Қаниев Қазақстан футбол федерациясының президенттігіне өз кандидатурасын ұсынбайтынын айтты, деп хабарлайды 1bol.kz.
«Құрметті достар, осы күндері маған Қазақстан футбол федерациясының президенті лауазымына үміткер болуымды қалап жатқандар көбейді. Бірнеше қоңырау түсті. Сенімдеріңіз бен қолдауларыңыз үшін шын жүректен алғыс айтамын. Алайда, қазіргі жұмысбастылығыма байланысты өз кандидатурамды ұсыну жоспарда жоқ. Соған қарамастан, федерацияны қолдап, сүйікті ойынымызды дамытуға әрқашан дайын екенімді айтқым келеді», — дейді Берік Қаниев.
Айта кетейік, Берік Қаниев ҚФФ-ның бұрынғы президенті Әділет Бәрменқұловпен университет қабырғасында бірге оқыған. Сондай-ақ, екеуі 2022 жылы сайлауға түскен. Бәрменқұлов аз ғана дауыспен Қаниевтен басым түскен еді. Олигарх кейін сайлау қорытындысына шағымданған болатын.
Жалпы, Қаниев «Жас-Қыран» балалар-жасөспірімдер орталығының жетекшісі және Қазақстан футбол федерациясының Атқару комитетінің мүшесі болған.
Фото: Forbes.kz.
