Кейбір БАҚ өкілдері ресейлік кәсіпкер «Барысқа» 2 млрд рубль құюға дейін екенін жазып жатты. Себебі бұған дейін клубтың қарызы 1,7 млрд теңге екені айтылған, алайда көп ұзамай «Барыс» клубының сатылатыны туралы ақпараттың жалған екені анықталды.
Шыны керек, елордалық хоккей ұжымының өнеріне жанкүйердің көңілі толмай жүр. Себебі жыл сайын мемлекет тарапынан «Барысқа» миллиардтаған қаржы жұмсалады. Сөйте тұра команда ҚХЛ тарихында екінші кезеңнен әрі аса алмаған. Соңғы кездері «Барысты» ҚХЛ құрамынан шығады деген болжам айтыла бастап еді. Дегенмен ұйым мұны жоққа шығарды. Себебі басшылық «Барыстың» сапта қалуына мүдделі.
Өйткені қазақстандық клубсыз лиганың «халықаралық» деген мәртебесі бос сөзге айналады. Қытайдың «Куньлуні» Мәскеу маңындағы Мытищиде ойнағанымен, қазір Санкт-Петербургке көшіп кеткен. Беларусьтің «Динамосы» бар, бірақ олар да сенім ұялатпайды. Мұндай жағдайда Қазақстан клубының құрамда болуы лиганың «құрлықтық» деген атауын сақтап қалуға кепіл.
Айта кетейік, ҚХЛ тұрақты чемпионатының қорытындысы бойынша «Барыс» Шығыс конференциясының турнирлік кестесінде 35 ұпаймен 12-орынға жайғасты. Команда 68 матчта 54 рет жеңілген.
Фото: ХК «Барыс».
