Құрлықтық хоккей лигасында ойнайтын Астананың «Барыс» клубы Ғалым Мәмбетәлиев тізгінді ұстағалы төртінші жеңісіне қол жеткізді, деп хабарлайды 1bol.kz.
Бұл жолы жерлестеріміз қонақта Ресейдің «Нефтехимик» (Нижнекамск) командасымен кездесті.
Тура екі күн бұрын екі команда ойнаған болатын. Ол кезде қарсылас 4:1 есебімен жеңіске жеткен еді. Бұл жолы «Барыс» қаһарына мінді. Алғашқы голды кездесудің 18-минутында астаналық команда сапынан Әлихан Өмірбеков соқты.
Екінші кезеңде қос команда да өз мүмкіндігін пайдалана алған жоқ. Нәтижесінде таблода өзгеріс болмады.
Ал шешуші үшінші 20-минуттықта «Нефтехимик» сапынан Жан-Себастьен Ди таразы басын теңестірді.
Ойынның негізгі кезеңі 1:1 есебімен тең аяқталып, мәселе овертаймда шешілді. Бұл жолы «Барыс» сапынан Кирилл Панюков жеңіс шайбасын соқты.
Сөйтіп елорда клубы солтүстікамерикалық легионерлерін қуып, қазақ бапкерін тағайындағаннан кейінгі төртінші жеңісіне қол жеткізді. Енді «Барыс» алдағы екі ойынын сырт айдында өткізеді. Алдымен 15 қарашада «Салават Юлаев» (Уфа), сосын 17 қарашада «Сочимен» жолығады.
Фото: Барыс ХК.
