Қазақстандық «Барыс» командасы 12 қазанда Құрлықтық хоккей лигасындағы кезекті ойынын елордада Ресейдің «Торпедо» (Нижний Новгород) командасына қарсы өткізді.
Екі команда бұған дейін 29 мәрте кездескен. Оның 14-і елордалық клубтың басымдығымен аяқталса, қалған ойында қарсылас команда жеңіске жеткен.
Кездесуді қазақстандық команда белсенді бастады. Нәтижесінде олардың қатарынан Кирилл Панюков 4-минутта есеп ашса, оған 5-минутта ресейлік клубтан Максим Летунов бір шайбамен жауап берді. Ал Райли Уолш 8-минутта қайтадан «Барысты» алға шығарса, одан кейін Сергей Гончарук 27, Александр Яремчук 29-минутта екі шайба соғып кетті.
Ойынның 30-минутында қазақстандық клубтан Семён Симонов таразы басын теңестірсе, «Торпедо» сапынан Михаил Абрамов 31, Алексей Кручинин 34-минутта тағы екі гол соқты.
Осылайша «Барыс» қарсыласына 3:5 есебімен есе жіберді.
Айта кетсек, екі команда да қатарынан төрт мәрте жеңілістің ащы дәмін татқан болатын. Бұл жолы «Торпедо» сол сәтсіздікке нүкте қойды.
Елордалық клуб бұдан кейін төрт ойынын елордада өткізеді. Алдымен 14 қазанда Ресейдің «Сибирь» (Новосібір) командасымен кездессе, 16 қазанда «Авангард» (Омбы), 18 қазанда «Ак Барс» (Қазан), 24 қазанда «Амур» (Хабаровск) клубымен шеберлік байқасады.
Фото: Виктор Федюнин/ Kazinform.
