«Барыс» хоккей клубы биыл да еңсе тіктей алар емес. Жеті ойын өткізіп, небәрі үш ұпай еншіледі. 23 клуб ойнайтын ҚХЛ кестесінде көш соңында табан тіреп тұр (жалпы кестеде де, «Шығыс» конференциясында да, Чернышев дивизионында да).
Кеше «бас бапкерін қызметінен босатты» деген ақпарат ду етті. Бірақ «Барыстың» ресми сайтында бұл жөнінде бір ауыз сөз жоқ. ҚХЛ сайты да – «үнсіз». Біздің елдегі басылымдар бас бапкер қызметін Королев атқарады деп жазып жатыр. Кейбіреулері Андрей Шаяновты да атайды.
Қайсы болса да, екеуі де – клуб тізгінін уыстарына қысып ұстап отырған қос құрдастың, яғни Борис Иванищев пен Олег Болякиннің сенімді адамдары. Бүгінгі ойынға «Барысты» қай бапкер бастап шығатынын тек кешке көреміз.
Біз түсінбейтін мәселе көп. «Барыстың» тізгіні шайбалы хоккейдің сүйек майын шаққан білікті мамандардың қолында делік. Онда олар Дэвид Немировскиді неге шақырады?! Неге біліктілігі «төмен» бапкерді таңдайды? Шынымен де, өздері шайбалы хоккей мамандары ма?
Ал маған… Немировски ұнады! Шындықты бетке айтты. «Біз легионерлерді нәтиже көрсетсін деп алдық қой. Ал олар (Майкл Маклаудтан басқасы) мүлде көмектеспейді» – деп бүкіл елдің алдында өкпе-назын төгіп салды. Әлде «Барыс» басшыларына осы сөздері ұнамай қалды ма?!
Көрші елден жинап әкелген шал-шауқандары командаға көмектеспек түгілі, ұжымдық ойын үлгісіне кесірлерін тигізбей жүре алар емес. Өз аяқтарымен өздері сүрініп, мұз айдында құлап та жатыр. Біреуі біздің қақпаны алдында сүрініп құлап, қарсыласымыз гол соғып кетті. Екіншісі, көзі нашар көре ме, қақпамыздың алдында, пас бергенде жаза басты. Тағы да гол!
«Барыс» екі құрдастың басшылығымен екі жыл қатарынан плей-оффқа шыға алмады (20-орын және 22-орын). Биыл да шыға алмай қалуы ғажап емес. Әрі биыл былтырғы «сценарий» қайталануы да мүмкін сияқты. Бір бапкер кетті, екіншісі келеді. Ол да команда еңсесін тіктей алмаса, Жаңа жылдан кейін бас бапкерлік қызметке Олег Болякин мырза келеді…
Нұрғазы Сасаев.
