Иә, әл-желіден жік шықты, екі құлағы тік шықты! Шымкент қаласының әкімі «Асхат Тағыберген не ойнамайды, не кетпейді, ал жалақысы — 20 000 000 теңге» депті… Шын ба? Өз құлағыммен естіген жоқпын, Тек баспасөз беттерінен оқыдым…
Рас болса, Асхатқа ойлану керек екен. Команданың жағдайын ойлап, өзінің спорттық бабын ескеріп, бір ортақ мәмілеге келу керек секілді. Байсуфинов, Әлиев сияқты терең ойлы азаматтар «ұлт мүддесі үшін тегін южұмыс істеуге әзірмін» деп отырғанда, Тағыбергенге таразылау керек, бұл түйінді…
Бір жағынан «Ордабасы» клубына таң қаламын. Келісімшартқа отырғанда не ойлаған?! Немесе қай жерімен ойлаған?! Көбінесе, басқа командаларға қажет болмай қалған ойыншыларды жинап алады да… сенім үдесінен шыға алмай жүреді.
«Ордабасы» дәл осылай Астана-2″ де, «Қайрат-2» де болып көрді. Содан Асхат Тағыбергенді алып, оның жанына басқа да тәжірибелі ойыншыларды топтастырып, ойын өрнегін осы Асхат арқылы өрбітіп, 2023 жылы ТҰҢҒЫШ рет Қазақстан чемпионы болды.
2023 жылы «Ордабасы» Қазақстан премьер лигасында 26 ойын өткізіп, 58 ұпаймен топ жарды. Асхат осының 24-інде алаңға шығып, 11 гол соқты. Әр матчта өз үлесін қасықтап болсын қосты. Бірақ оның бәрі өткен шақ екен…
Асхат Тағыберген Дания құрамасының қақпасына алыстан, шірене доп теуіп, қақырата гол соққанда, оны «Халық қаһарманына» баладық. Енді «қоқысқа» лақтырып тастауға дайын екенбіз. Өкінішті… Бір кем дүние…
Сонымен, ардақты ағайын, құрметі достар! Кімдікі дұрыс? Неге осы мәселені ың-шыңсыз, өзара шешіп алмасқа?! Егер «не ойнамайтын, не кетпейтін ойыншылар керек болса, «Барыс» хоккей клубының бір өзінде ондайлар жетерлік.
Мәселен, Дамир Жафяров деген хоккейшінің жалақысы $584,7 тыс (292,35 млн тенге) деп айта алатын басшы бар ма? Кейде өзімізді-өзіміз түтіп жеуге дайын тұратындаймыз ба? Әлде менікі дұрыс емес пе?
Пікір иесі Нұрғазы Сасаев.
