Көкшетаулық «Арлан» шайбалы хоккейден 2025 жылғы Қазақстан чемпионы атанды, дейді ҚазАқпарат.
Көкшетаулық команда Қазақстан чемпионаты плей-офф сатысының финалдық кезеңінде төртінші ойын қатарынан өскемендік «Торпедодан» басым түсіп, жеңіс тұғырына көтерілді.
Алғашқы кезеңде қарсыластар бір-бірінің қақпасына гол сала алған жоқ. Ойынның 38-минутында Степан Санников «Арланды» алға шығарса, Владислав Никулин 39-минутта басымдықты арттырды.
Оған үшінші кезеңде «Торпедо» сапынан Максим Базанов бір голмен жауап қайырды.
Осылайша «Арлан» қарсыласынан 2:1 есебімен басым түсіп, биылғы чемпионатта жеңіс тұғырына көтерілді.
Көкшетаулық клуб бұдан бұрын аталған қарсыласынан үш мәрте (3:2, 6:3, 9:2) басым түскен еді.
Қазақстан чемпионаты 1992 жылдан бері тұрақты түрде өткізіліп келеді. Қазірге дейін жеңімпаз атағына өскемендік «Торпедо» 13 мәрте ие болса, одан кейін «Бейбарыс» (Атырау) — 4, «Ертіс» (Павлодар) мен «Сарыарқа» — 3, «Барыс» (Астана), «Номад» (Астана), «Арлан» (Көкшетау) -2,«Қазақмыс» (Сәтпаев) пен «Болат» (Теміртау) -1 мәрте жеңіс тұғырына көтерілді.
Фото: Pexels.
