Қазақстанның жұптық сындағы бірінші, әлемнің 13-ракеткасы Анна Данилина Токио (Жапония) WTA 500 турнирінің жартылай финалына жолдама алды.
Жарыстың 3-ракеткалары болып тіркелген А.Данилина мен сербиялық Александра Крунич ширек финалда америкалық Николь Меличар – қытайлық Сюй Ифаньның мысын басты.
Екі сетте де 6:4 есебі тіркелді.
Бір сағат 16 минутқа созылған бәсеке барысында қазақстандық-сербиялық жұп 1 эйспен бірге 7 брейк-пойнттың бесеуін мүлт жібермеді. Америкалық-қытайлық дуэт 1 эйс, 3 брейкпен (5 брейк-пойнт) көзге түсті.
Анна Данилина – Александра Крунич финалға шығу үшін жапониялық Сюко Аояма – испаниялық Кристина Букшамен шеберлік таластырады.
Осылайша, Токио додасының жартылай финалында қос бірдей қазақстандық теннисші ойнайды.
Елена Рыбакина жекелей, Анна Данилина жұптық сында өнер көрсетеді.
Қазақстанның ерлер арасындағы бірінші, әлемнің 16-ракеткасы Александр Бублик бүгін Вена (Аустрия) ATP 500 турнирінде дүниежүзілік рейтингіде көш бастап келе жатқан италиялық Янник Синнермен жартылай финал жолдамасын сарапқа салады.
Фото: ҚТФ.
