Астана қаласында спорт маркетингі саласындағы жыл сайынғы «Altyn Adam Sport Marketing 2024» премиясын табыстау шарасы өтті. Нәтижесінде Қазақстан футбол федерациясының «ALAÑ» жобасы «Спорт пен салауатты өмір салтын насихаттау саласындағы жобаның үздік маркетингі» номинациясында топ жарды. Сондай-ақ, ҚФФ пен 1ХВЕТ компаниясы бірлесе отырып, «Үздік букмекерлік белсенділік» номинациясында екінші орынға ие болды.
«Altyn Adam Sport Marketing» премиясы алғаш рет Қазақстанда өткізіліп жатыр. Басты мақсат – спорт маркетологы, PR-менеджер, демеушілік бойынша мамандар, лига клубтарының менеджерлері мен басшылары, отандық спорттағы әлемдік шараларды ұйымдастырушы азаматтардың еңбегін бағалау. Жалпы 17 номинация бойынша жеңімпаздарды спорт функционерлері, спорт маркетингі саласындағы отандық және шетелдік сарапшылар, журналистер ақылдаса отырып анықтады.
Айта кетейік, бұқаралық спортты дамытуға бағытталған Мемлекет басшысының тапсырмасын орындау мақсатында 2023 жылы Қазақстан футбол федерациясы елімізде футбол алаңдарын қайта жаңартатын «ALAÑ» бағдарламасын енгізді. Үш жылға арналған бағдарлама УЕФА-ның қолдауымен жүзеге асырылады. Жобаның басты серіктесі — 1XBET букмекерлік компаниясы. Негізгі мақсат — футбол инфрақұрылымын дамытып, бұқаралық футболды дамытуға жағдай жасау. Жалпы «ALAÑ» жобасы бойынша 2023-2025 жылдары республикамыздағы 20 футбол алаңын жаңарту жоспарда бар. Бұған дейін елімізде Алматы, Шымкент, Ақтөбе, Петропавл, Өскемен, Аягөз, Ақсу қалалалары мен Жетісу облысындағы алаңдар қолданысқа берілген болатын.
