Абат Айымбетовтың агенті Траян Гергишан ASnews.kz тілшісіне берген сұхбатында қазақстандық шабуылшының болашағы туралы пікір білдірді.
«Абатқа қатысты жағдай ерекше болып тұр. Бізге бірнеше ұсыныстар келіп түсті, оларды мұқият қарап жатырмыз, өйткені шешім қабылдаған кезде қателескіміз келмейді. Жақында Түркия, Румыния, Иран және Парсы шығанағы елдерінің клубтарымен келіссөздер жүргізгенімді растай аламын», – деді агент.
Гергишанның айтуынша, қазақстандық ойыншының көңіл-күйі жақсы екен:
«Оның отбасылық және жеке өмірінде мәселелері жоқ – бәрі жақсы. Біз оның болашағына қатысты нақты шешім қабылдағанша күтуіміз керек. Абат қазір бабында».
30 жастағы шабуылшы соңғы рет мамыр айында «Адана» сапында алаңға шыққан еді. Ол Түркия чемпионатының 37 матчында алты гол соқты.
Айымбетов оған дейін «Ақтөбе», «Қайрат», «Астана» және «Крылья Советов» командаларында ойнаған.
