Көркем гимнастикадан Қазақстанның ең танымал тұлғаларының бірі Әлия Юсупова ұлттық құраманың бас бапкері қызметінен кеткенін жариялады, — деп хабарлайды Massaget.kz.
Ол екі бірдей Олимпиада ойындарына қатысып, 2012 жылдан бастап Қазақстан құрамасын басқарды.
Оның жетекшілігімен қазақстандық гимнастар халықаралық ареналарда табыстарға жетіп, құрлықтық чемпионаттарда, Азия ойындарында және әлемдік турнирлерде медальдар жеңіп алды.
Әлия Юсупованың айтуынша, бұл шешім Қазақстан гимнастика федерациясындағы жұмысына толығымен көңіл бөлгісі келгенімен байланысты.
«2009 жылы спорттық мансабымды аяқтаған соң өзімді бапкерлік қызметте сынап көргім келді. Мен өзім дайындаған гимнасты Олимпиадаға шығарып, сол ойындарға бапкер ретінде қатысуды мақсат еттім. 2012 жылы маған осындай мүмкіндік беріліп, Қазақстан құрамасының бас бапкері қызметіне кірістім. Үш Олимпиадада біз жақсы нәтижелер көрсете алдық. Үш рет гимнастарды Олимпиадаға дайындағаныма өте қуаныштымын. Мұндай жауапты қызметте маған сенім артқаны үшін елге, басшылыққа алғысымды білдіремін. 2025 жылдың қаңтарынан бастап бас бапкер қызметінен кетемін, өйткені федерациядағы жұмысқа толықтай көңіл бөлгім келеді. Осылайша, басқа бапкерлерге өздерін көрсетуге мүмкіндік беруді жөн көрдім. Баршаңызға сәттілік тілеймін», — деді Әлия Юсупова.
Әлия Юсупова — Қазақстан Республикасының еңбек сіңірген спорт шебері және еңбек сіңірген бапкері. Ол екі рет Олимпиада ойындарында өнер көрсетті. 2004 жылы Афинада Юсупова жүлдеден бір қадам қалыс қалса, 2008 жылы Бейжіңде бесінші нәтиже көрсетті.
Оның басшылығымен үш спортшы Олимпиада ойындарына жолдама алды. 2016 жылы Сәбина Әшірбаева, 2020 жылы Әлина Әділханова, ал 2024 жылы Эльжана Тәниева Олимпиадада өнер көрсетті.
Көркем гимнастикадан Қазақстан спортшылары Азия чемпионаттарында, Азия ойындарында және Әлем кубогы мен Гран-при кезеңдері секілді беделді әлемдік турнирлерде жүлделі орындарға ие болды.
Әлия Юсупова «Ерен еңбегі үшін», «Әлемдік деңгейдегі гимнаст» медальдарымен және «Құрмет», «Парасат» ордендерімен марапатталған.
Еске салайық, бұған дейін көркем гимнастикадан Қазақстан құрамасының көшбасшысы, үш дүркін Азия чемпионы Эльжана Тәниева спорттық мансабын аяқтаған еді. Ол бұл туралы Іnstagram-дағы парақшасында жазды.
«Мен кәсіби мансабыммен қоштасамын. Бұл мен үшін жай ғана спорт емес, өмірімнің бір бөлігі болды. Мен төрт жасымда алғаш рет гимнастика залына кірген күнді ешқашан ұмытпаймын. Сол кезде мен кішкентай бала болсам да, жүрегімде олимпиада арманын орындауға деген ұмтылыс болды. Кілемге шығар алдындағы толқу, прожектор жарығы астындағы әр қозғалысым, көрермендердің шапалағы — мұның бәрі мәңгі есте қалады. Бұл жол оңай болған жоқ. Кейде күшім таусылғандай, қиындықтар еңсерілмейтіндей көрінетін сәттер болды. Бірақ дәл сол сәттерде маған сенген адамдар жанымнан табыла білді, — деді спортшы.
Эльжана Әлия Юсупованың шәкірті болды. Спортшы Әлия мен жаттықтырушыларына алғысын білдірді.
Фото: olympic.kz.
