Футболдан Қазақстан құрамасының бас бапкері Әли Әлиевтің миллиондаған жалақысы қоғамда қызу пікірталас тудырды. Бұл мәселеге Туризм және спорт министрі Ербол Мырзабосынов ресми түсініктеме берді, деп жазады penalty.kz.
Әлиевтің ісі құқық қорғау органдарының бақылауына алынды
БАҚ-та жарияланған деректерге сәйкес, Әли Әлиев Петропавлдың “Қызылжар” клубын жаттықтырып жүрген кезінде ай сайын 10 миллион теңге көлемінде жалақы алған.
“Бұл жағдайда еңбек шарты заңды деп танылды. Әли Әлиев бұл шешімге кассациялық шағым беріп жатыр. Қазір бұл мәселе бойынша нақты ұстанымымыз жоқ”, – деді министр Мырзабосынов брифинг барысында.
Министр қосымша атап өткендей, бұл мәселе бойынша құқық қорғау органдары мен жергілікті әкімдік тексеру жүргізіп жатыр. Қорытынды нәтиже шыққан соң, Футбол федерациясымен бірлесіп ресми ақпарат беріледі.
Қаржы тәртібі өзгереді
Министрдің сөзінше, жаңа заңнама бойынша спортшылар мен бапкерлердің жоғары мөлшердегі жалақысы бюджет есебінен төленбейді:
“Бұрын футболшылар мен жаттықтырушылар түрлі көлемде қаражат алса, енді заң бойынша мемлекеттік бюджеттен ең көбі 2 миллион теңге ғана бөлінеді. Қалған соманы клубтар жеке көздерден табуы тиіс”, – деді министр.
Әлиевтің келісімшарты қалай өзгерді?
Әли Әлиев “Қызылжар” футбол клубында 2023 жылдың 1 маусымынан бастап жұмыс істеген. Алғашқы келісімшарты бойынша айлығы 6,5 млн теңге болған. Алайда жарты жылдан соң келісім қайта жасалып, жалақы көлемі 10 миллион теңгеге дейін өскен.
Даулы жағдай клуб басшылығы ауысқаннан кейін басталған. Қазір бұл іс сотта қаралып жатыр.
Фото: offside.kz.
