Мексикалық нокаутер, жартылай жеңіл салмақтағы бұрынғы әлем чемпионы Маурисио «Бронко» Лара (26-3-2, 19 KO) екі жылға спорттан шеттетілді, деп жазады penalty.kz.
Бұл шешімді Британдық антидопингтік агенттік (UKAD) қабылдады.
Маурисио Лара бұл жағдайға қатысты UKAD-қа түсініктеме беріп, жекпе-жек алдында иығына дексаметазон инъекциясы жасалғанын айтты. Бірақ агенттік бетаметазонның ағзада пайда болуын бұл себеппен түсіндіруге болмайтынын алға тартты.
UKAD Лараға екі жылдық шеттету жазасын «кері күшпен» қолдану туралы шешім шығарды. Бұл шектеу 2024 жылдың наурыз айынан бастап есептеледі.
Айта кетерлігі, осы уақыт аралығында Лара екі рет жекпе-жек өткізіп, екі мәрте ерте жеңіске жеткен. Ол Педро Дельгадо мен Эдвинг Давиланы нокаутпен жеңіп, өзінің спорттық формасын жоғалтпағанын дәлелдеген.
Маурисио Лараның мансабындағы басты сәттер
Лара әлемдік деңгейдегі боксшы ретінде 2021 жылдың ақпанында көзге түсті. Ол сол кезде Ұлыбританияда өткен жекпе-жекте жергілікті жұлдыз Джош Уоррингтонды сенсациялық түрде нокаутпен жеңді.
Лара мен Уоррингтонның жекпе-жегі. ФОТО: boxingnews24.com.
Көпшілік күткен қарымта жекпе-жек техникалық тең нәтижемен аяқталды, себебі Уоррингтон кездейсоқ соққы жасап, Лараның көзін жарақаттаған болатын.
Ал 2023 жылдың ақпанында мексикалық боксшы Ли Вудтан WBA чемпиондық белбеуін тартып алды. Ол бұл кездесуде 7-раундта техникалық нокаутпен жеңіске жеткенімен, судьялардың ұпай санымен ұтылып жатқан еді.
Фото: bbc.co.uk.
