Boxrec статистикалық платформасы салмақ дәрежесіне қарамастан үздік әуесқой боксшылардың жаңартылған рейтингін жариялады, деп жазады 1bol.kz.
Ұйым өкілдерінің айтуынша, Boxrec рейтингі тек механикалық жолмен, алгоритм арқылы жасалады. Мұнда қарсыластардың деңгейі, спортшының жетістіктері және басқа да маңызды факторлар ескеріледі. Бұл рейтингтің кей тұстары күмән тудырғанымен, ол негізінен боксшының (кейде тұтас елдің) деңгейін көрсететіні анық.
Салмақ дәрежесіне қарамай үздік боксшыларды анықтайтын P4P (Pound for Pound) рейтингі де осы себепті назар аударуға тұрарлық. Белгілі болғандай, Париж Олимпиадасы бұл тізімге елеулі өзгеріс әкелген: жеті чемпионның бесеуі ТОП-10 қатарына енген. Бұл қатардан тек Асадхуджа Муйдинхуджаев пен Хасанбой Дусматов түсіп қалған. Себебі, Муйдинхуджаев салмағын 71 келіден 65 келіге азайтса, Дусматов, керісінше, 51 келіден 54 келіге жоғарылады. Тиісінше олар әзірге ондыққа енбей тұр.
Ал көшбасшылар тізімі күмән тудырмайды: Баходир Жалолов, Абдумалик Халоков және Александр Хижняк. Парижде жалғыз күміс сыйлаған Нұрбек Оралбай да ТОП-10 қатарына кіріп, бұл мәртебеге ие болған жалғыз қазақ боксшысы атанды. Ал өзбек боксынан бірден бес былғары қолғап шебері рейтингтің шыңында тұр.
Енді қыркүйекте өтетін World Boxing аясындағы әлем чемпионатынан кейін бұл рейтингте тағы елеулі өзгерістер болатыны сөзсіз. Сол кезде ғана біздің бокстың Олимпиададағы сәтсіздіктен кейін қаншалықты алға жылжығанын анық көреміз.
Фото: Olympic.uz.
