Дүние кезек дейсіздер ме, жоқ әлде, бумеранг деп қысқа қайырасыздар ма? Өз еріктеріңіз. Бірақ, Алиев пен Адиев бірін-бірі екінші рет алмастырып отыр…
2021 жылы сәуір айында Али Алиев «Шахтер» клубының бас бапкері қызметінен кетіп, орнына Магомед Адиев келді. Міне, 2025 жылы Алиев Қазақстан ұлттық құрамасын жаттықтыра бастады.
Рас, екеуінің арасында бір көршіелдік бапкер болған. Бірақ оның атын ешкім де атамайды. Тезірек ұмытуға тырысады. Біз де оны атын атап, есімізге салмайық…
Кейбіреулер Алиев пен Адиевті әлден салыстыра бастағандай. Бірақ Али Ханалиевич буын алмастыру кезеңіне тап болғанын ешкім де ескеріп жатқан жоқ секілді. Бұл – бір күрмеуі күрделі өтпелі кезең, негізі.
Жалпы, Алиев егде тарта бастаған бірнеше ойыншымызды құрама сапына шақырған жоқ. Баз біреулер оны «Адиевтің ойыншыларын құтылды» — деп жүр. Олар:
- Шацкий, Малый, Қайыров, Досмағамбетов, Бейсебеков, Қуат, Жарынбетов… және Скворцов…
- Бірақ… құрама сапындағы ардагер ойыншылар санын әлі де азайту керек сияқты. Түсінеміз, бәрін бірдей алып тастауға болмайды. Тәжірибе мен жастық жалынды ұштастыру керек. Десек те…
Кешегі матчта мұндай ойыншылар өздерінен-өздері «екшеліп», «мен мұндалап» көзге түсіп қалды. Кімдер екенін, өздеріңіз де жақсы білесіздер.
Тәжірибелі ойыншылар ретінде Әліп, Оразов, Қасым, Жуков, Быстров, Чесноков, Самородов, Покатилов сынды жігіттерді ғана алып қалғаны дұрыс па екен?!
Бұларға Асранкулов, Кеңесов, Сәдібеков, Шушеначев секілді футболшыларымызды қосса қалай?! Валиуллин де өкпесі «тесік» жанкешті еді ғой…
Қалай десек те, Алиевке мүмкіндік беру керек. Бірден сынап, қыспаққа алуға болмайды. Әрі… Адиевпен салыстырып, одан пікір алып, жағдайды ушықтыра түсудің де қажеті жоқ.
Нұрғазы САСАЕВ.
