Бүгін Париж Олимпиадасының қорытындысына арналған ауқымды жиын өтті. Алқа отырысына Президент Әкімшілігінің өкілдерінен бастап, спортқа жауапты федерациялар мен облыстық спорт басқармалары басшылары түгелдей қатысты. Жиналыс барысында Е-SPORT» цифрлық платформасы енгізілетіні айтылды.
Негізі бұл жоба 2020 жылы қолға алынған. Бірақ, әртүрлі себептермен жұмысы тұралап қалды. Неге екенін бағамдау да қиын емес. Бұл бағдарлама іске қосылса, спорт саласындағы жұмыстар, оның ішінде, ақшаның айналымы ашық көрінеді. Ол саланы әбден майшелпекке айналдырғандарға өте тиімсіз.
«Аталған платформада біріккен спорттық классификация, спорттық күнтізбе, спортшылардың, жаттықтырушылар мен төрешілердің біріккен электрондық базасы сынды спортқа қатысты басты құжаттар сақталады» — делінген ресми хабарламада. Сәйкесінше, осы жобаны жетелдетіп іске қосу мәселесі көтерілді. Онсыз болмай тұр.
Жоғары жетістікер спортының өзіне жыл сайын мемлекеттен 10 миллиард теңге, ал, арнайы қордан 3 миллиард теңге қаржы бөлінеді. Ал, облыстық спорт басқармаларында жүздеген миллиард теңге айналып жүр. Бірақ, ешкім соның есебін беріп жатқан жоқ. Әсіресе, өтірік уәделер мен міндеттемерді үйіп-төгіп, соған қажетті қыруар қаржыны алғандар, кейін Париж олимпиадасында масқара болғандар қазір үнсіз. Яғни, ақша ауаға кетті деген сөз. Өкінішітісі, оған ешкім жауап та бермейді. Осы тұрғыда әлгі платорманы максималды қысқа уақытта қолданысқа енгізу керек. Бірақ, оның өзіне миллиардтар бөлініп, арты сиырқұйымшақтанып кетпесе екен. Платформаны жасау жұмыстарының есебі де ашық болуы қажет…
Аслан Каженов.
