Сербияның Врнячка-Баня қаласында оқушылар арасындағы шахматтан әлем біріншілігінде 7 жастағы Абдул-Мәлік Қайрат өз жас категориясында (U7) әлем чемпионы атанды, деп жазады penalty.kz.
Абдул-Мәліктің шешуші жеңісі 5-турда тіркелді — ол басты қарсыласы, үндістандық Ом Еш Готтумукаланы тізе бүктірді. Осыдан кейін отандасымыз 8 турдың қорытындысы бойынша 8 ұпай жинап, жарыстың соңғы кезеңінде бәсекелестеріне қолжетпес нәтиже көрсетті.
Үндістандық қарсыласынан бір ұпай алда келе жатқан Абдул-Мәлік жеке кездесудегі жеңістің арқасында 2025 жылғы әлем чемпионы атағын мерзімінен бұрын иеленді.
Үндістан шахматшысы қыздар арасында көш бастады
Дәл осындай мінсіз нәтиже қыздар арасында да тіркелді: Үндістан өкілі Прагника Вака Лакшми (категория G7) барлық 8 партияда жеңіске жетіп, қарсыластарынан екі ұпай айырмашылығымен алда келе жатыр. Оның чемпиондығы да алдын ала белгілі болды.
Қазақстандықтар алтынға тағы жеті топта таласады
Бүгін жарыстың соңғы күнінде қалған он жас санатында чемпиондар мен жүлдегерлер анықталады. Соның ішінде жеті категорияда Қазақстандық жас шахматшылар алтын медаль үшін күрес жүргізіп жатыр.
Фото: ашық дереккөздерден.
