Қазақстандық 17 жастағы талант Бексұлтан Мақыш Канаданың Онтарио хоккей лигасында (OHL) ерекше ойын өрнегін көрсетіп, кезекті матчта нәтижелі пас берді. Оның клубы “Windsor Spitfires” турнир кестесінде көш бастап тұр, деп жазады penalty.kz.
Солтүстік Америкадағы Онтарио хоккей лигасының кезекті турында “Windsor Spitfires” командасы “Guelph Storm” клубын 3:2 есебімен овертаймда жеңіп, үздік қатарын нығайта түсті.
Матчтың басты жаңалығы – қазақстандық шабуылшы Бексұлтан Мақыштың нәтижелі ойыны. Жас спортшы шешуші сәттерде пас беріп, өз командасына жеңіс әкелуге үлес қосты.
Бұл – Мақыштың маусымдағы тоғызыншы ойыны, ал оның жеке статистикасы таңғаларлық:
- 6 гол
- 4 нәтижелі пас
- 10 ұпай
Осы көрсеткішпен ол жасына қарамастан лиганың ең жарқын жас ойыншыларының бірі атанып отыр.
Қазіргі таңда “Windsor Spitfires” командасы 16 ұпай жинап, ең жақын қарсыласынан 6 баллға озып, Онтарио хоккей лигасының көшін бастап келеді.
Айта кетейік
17 жастағы Бексұлтан Мақыш – Қазақстан хоккейінің жаңа толқынының өкілі. Ол бұған дейін ел ішіндегі жасөспірімдер құрамасында ойнап, кейін Канададағы хоккей академиясына шақырту алған. Қазір оның ойынын жергілікті скауттар мен NHL бақылаушылары жіті қадағалап отыр.
Бірнеше сарапшының пікірінше, егер Мақыш осы қарқынын сақтаса, жақын жылдары NHL драфтына қатысуға нақты үміткерлердің бірі атануы мүмкін.
Фото: thehockeywriters.com.
