Шардара Армспорт құрамасының жасөспірім спортшысы Ұлболсын Елмұрат әлемдік жарыстың жеңімпазы атанды.
Болгарияның Албена қаласында өтіп жатқан ересектер арасындағы қол күресінен әлем чемпионатында шардаралық Ұлболсын Елмұрат қарсыластарын қапы қалдырды.
Финалдық кездесуде ол аңызға айналған словакиялық спортшы, 13 дүркін әлем чемпионы Лусия Дебрановамен күш сынасты. Тәжірибелі қарсыласына мүлдем мүмкіндік бермей, сенімді жеңіске жеткен қазақтың қаршадай қызы әлем чемпионы атанды.
Айта кетсек, Ұлболсынның жасы небәрі 16-да. Соған қарамастан, ол әлемдік аренаның басты белдесуінде тәжірибелі спортшыларды қапы қалдырып, еліміздің абыройын асқақтатты.
Фото: видеодан алынған скрин.
